السكن الجامعي بالنسبة للطلبة القدامى ثلاثة أنواع:

1. تجديد سكن.

2. إسعاف بالسكن.

3. السكن الإستثنائي.

تجديد السكن:

تجديد السكن خاص بالفتيات فقط على خاطر عندهم الحق في عامين كاملين و بالنسبة للمبيت لنفترض أنك العام الأول متاعك في الفاك كريت يعني مقدمتش مطلب سكن جامعي روا تحتسب و كأنك خذيت و بالنسبة للبنات العام الثاني في الفاك يعملو تجديد و العام الثالث يعملو إسعاف سكن.

كيفاش نعمل تجديد سكن:

تجديد السكن يكون على موقع ديوان الجامعية الراجع ليك بالنظر يعني تدخل تعمر مطلب تجديد السكن أونلاين على موقع الخدمات الجامعية و تستنى يجاوبوك و على فكرة ينجمو يقلولك على أوراق يلزمك تحضرهم و تهزهم للمبيت.

بالنسبة للي عامل إعادة توجيه متاع مارس إلي تصير في الربيع وإلا عامل نقلة جامعية و إلا إعادة توجيه بالملفات تنجم تستنى لين يصير تحديث في قاعدة بيانات متاع ديوان الخدمات الجامعية الراجع ليك بالنظر باش تلقى جامعة إلي باش تنقللها و إلا الشعبة إلي باش تحوللها و متصيرلكش مشاكل منبعد.

إسعاف بالسكن:

إسعاف بالسكن يهم خاصة أولاد اللي نجحو في الباك الأعوام الماضية و إلا البنات إلي خذوا الباك العام إلي قبل إلي فات و إسعاف السكن موش مضمون 100 في المائة باش أنهم يقبلولك المطلب متاعك يعني كيما تنجم تأخد موافقة بالسكن و كيما زدى ينجم يتم رفض مطلب السكن متاعك على خاطر إلي ناجحين جدد في الباك هوما عندهم الأولوية و منبعد يتعدو لجماعة تجديد السكن و منبعد يتعدو لجماعة إسعاف السكن و هذا منطقي جدا على خاطر المبيتات الأماكن فيها محدودة و حسب بعض التجارب تنجم تأخذ موافقة على إسعاف بالسكن بنسبة 60 بالمائة و إذا إنتي عندك ظروف إجتماعية و إلا صحية تنجم تتصل مباشرة بمقر ديوان الخدمات الجامعية الراجع ليك بالنظر و هزلهم ما يدعم و يثبت إلي عندك ظروف إجتماعية و إلا صحية و أحكي معاهم.

كيفاش نعمل إسعاف بالسكن:

الإسعاف زدى يصير على موقع ديوان الخدمات الجامعية الراجع ليك بالنظر و تستنى لين ديوان الخدمات يهبط بلاغ إلي بدوا يقبلو في مطالب إسعاف بالسكن وقتها تنجم تدخل عالموقع متاع ديوان الخدمات الجامعية الراجع بالنظر و تعمر نموذج الإستمارة، و ساعات فما شكون يقلك روا مهبط حتى بلاغ يخص الإسعاف بالسكن، إنتي في الحالة هاذي يلزمك تكتب مطلب بخط يديك و تبعثو بالبريد مضمون الوصول لعنوان مقر ديوان الخدمات الجامعية الراجع ليك بالنظر.

السكن الإستثنائي:

السكن الإستثنائي هو انو ساعات الطالب و إلا الطلبة يظهرلو و إلا يظهرلها باش يكمل و إلا تكمل تقرى أيامات فـ: وقتها تنجم تعمل مطلب إلى مدير المبيت الجامعي إلي تسكن فيه و إلا تعمل مطلب بخط يدك للديوان و إنتي و شنوى تحب و على فكرة يلزمك في المطلب تقلو شنوى السبب مثلا إنتي يلزمك تكمل أيامات تقرى فـ: تنجم تمشي للفاك إلي تقرى فيها و قوللهم يعطوك حاجة تثبت إلي إنتي مازلت باش تقرى و إلا باش تعمل تربص و الأسباب تختلف من طالب إلى آخر.

توضيحات:

المبيتات الجامعية في العادة يتم غلقها إنطلاقا من شهر جويلية